المعهد العالي للاتصالات والملاحة


 
الرئيسيةس .و .جبحـثقائمة الاعضاءالمجموعاتالتسجيلدخول

شاطر | 
 

 قصة قصيرة جداً و من وحي الخيال .. ( عبدالله , نورة )

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
نينا ريتشي



انثى عدد الرسائل : 825
المهنة/التخصص : كمبيوتر
تاريخ التسجيل : 23/08/2009

مُساهمةموضوع: قصة قصيرة جداً و من وحي الخيال .. ( عبدالله , نورة )    السبت نوفمبر 06, 2010 12:21 pm

السلام عليكم ..
اليوم كتبت قصة حيل حيل قصيرة و ألفتها من وحي خيالي و أتمنى تعجبكم مع إن الحب شي حقيقي و موجود بحياتناا لكن بالنسبة لي يعتبر خيال و ما وصل لدرجة الحقيقة
..
المهم نبدأ مع قصتنا :



عبدالله و نورة مخطوبين و صار لهم ست أشهر , عبدالله ( 25 سنة) يدرس بأمريكا و صار له ثلاث سنين و هو ألحين بآخر كورس و باقي له جم اسبوع
و يتخرج و يرد لديرته , نورة (22) سنة ادرست بمعهد في الكويت و تخرجت و صارت موظفة .
في يوم من
الأيام حنت نورة لعبدالله و دقت عليه ..
نورة : ألو السلام عليكم ..
عبدالله : و عليكم السلام يا هلاااا .. Smile
نورة : شلونك يالطيب عساك بخير ..
عبدالله : تمام الحمدلله دامني سمعت صوتج يالغالية ..
نورة : تسلم و عساه دووم ..
عبدالله : ها انتي شلونج شخبارج , عاد أنا من زمان عنج اشتقت لج ..
نورة : بخير الله يسلمك و انا أكثر و ما ناقصني إلا إني أشوفك ..
عبدالله : فديت اللي يشتاقون و الله Smile
نورة : ههههههههه Very Happy , ها شمسوي مع الدنيا ..
عبدالله : و الله ما كو , الدنيا و مشاغلها مو راضية تخلص لكن دام الحب موجود بيهون كل شي علينا ..
نورة : يه يه حدك رومانسي اليوم Smile , وه تعبت من الشوق متى ترد لي سالم و أكحل عيوني بشوفتك ..
عبدالله : عن قريب إن شاء الله , بس إدعيلي بالتوفيق و إني أرجع لج و للديرة سالم و ماسك شهادتي بيدي ..
نورة : يآآآرب ترده لنا سالم و غانم يآآرب ..
عبدالله : من بؤك لي باب السما هههههههه ..
نورة : ههههههههههههه ..
عبدالله : و إنتي ما قلتي لي عنج و عنج حياتج , شمسوية مع الدنيا ..
نورة : Sad توني أدري إن الدنيا بدونك ما تسوى شي , كل شي مظلّم بالنسبة لي , إنت النور اللي يخليني أشوف بحياتي , فديتك يالغالي Neutral
عبدالله : يه يه لهالدرجة انا غالي بالنسبة لج ..
نورة : و أكثر من جذي , عاد انا مجهزة لك مفاجأة لما ترد إن شاء الله ..
عبدالله : ايي و شنو المفاجأة ..؟؟
نورة : انا شقلت مفاجأة Surprise , الله يعينك اصبر ليما ترد و بتعرف إن شاء الله Smile
عبدالله : يالله شنسوي أمرنا لله .. شلون الأهل عساهم بخير ..
نورة : و الله كلهم بخير و مشتاقين لك بس مو مشتاقين لك كثري ..
عبدالله : يا بعد جبدي و الله ..
نورة : تعال بغيت اسالك شلون الأجواء عندكم ينزل عليكم مطر, ثلج , برد Smile
عبدالله : و الله الأجواء عال العال , تو اليوم ينزل ثلج , بحط شوي من هالثلج بكرتون و بدزه لج عالبريد الجوي ههههههههههه ..
نورة : هههههههههههههه وه شوقتني لغشمرتك و ملاقتك ههههههههههه ..
عبدالله : عساها دوم هالضحكة مو يوم ..
نورة : يسلمو حبيبي I love you ..
عبدالله : يالله حبيبتي أخليج ألحين , و إن شاء الله أدق عليج بوقت ثاني , و صلي سلامي للكل ..
نورة : يوصل يالغالي , بس مو جنه تو الناس , لا تروووح اقعد شوي , بروحي متضايقة من بعدك عني ..
عبدالله : افا افا , تتضايقين و انا موجود , يالله عن الدلع , كلها جم اسبوع و أكون عندج ما فيج صبر , بيننا تلفون و لو تبين نتواصل بالكاميرا شتبين أكثر من جذيه ..
نورة : أوكي أمري لله , بس الكاميرا ما تغنيني عن وجودك قبالي Smile فديتك ..
عبدالله : يا حياتي , يالله بسكر ألحين و راي دراسة في أمان الله ..
نورة : في أمان الكريم , و دير بالك على نفسك ما أوصيك ..
عبدالله : اوكي نونو قود باي ..
نورة : باي ..

و بعد مرور أسابيع بدوا امتحانات الفاينل عبدالله أعصابه مشدودة و حيل متوتر , لكن ما قصر في مقابل دروسه , و اهو من داخله يحس إنه بينجح و فعلا بعد كم يوم ,
على امتحانات الفاينل طلعت النتايج هو و الشباب اللي معاه و كلهم نجحوا , و من باجر رادين للديرة و أهلها .. نورة أول ما بطلت عيونها الصبح , قلبها يدق بسرعة , و بنفس الوقت متلهفة على شوفة الحبيب الغالي عبود .. , عبدالله ما نقدر نوصف الفرحة اللي في داخله لأنه تعب و درس و تغرب في النهاية رد و بيده شهادة ترفع راس أهله و راس ديرته , لكن في شي أغلى من كل شي بالدنيا اللي هي نورة ما غابت عن باله لحظة و اهي نفس الشي , الحب كلمة نقدر نوصف معانيها لكن ما نقدر نوصف كل المعاني اللي تحملها داخل المحبين , و الحب أسمى شعور ممكن يشعر فيه الإنسان , و لازم نحافظ على هالحب عشان ننجح بعلاقاتنا مع اللي نحبهم ..
نورة و الأهل كلهم بالمطار ناطرين وصول عبدالله ..
نورة مرتبكة و حالتها حالة و بنفس الوقت شوي و تموت من الوله .
عبدالله : في الطيارة و كل ما تنزل الطيارة تزيد دقات قلبه , لأنه تعذب من بعده عن ديرته و عن أهله و عن نور عيونه .. و اهو داخل المطار يدور على أهله , نورة شافت شي مو غريب عليها بين الزحمة و عيونها تلمع شوي و تبجي أول ما شافته , عبدالله : الإبتسامة شاقة وجهه لأنه شاف أهله و شاف الحب كله ..

نورة : الحمدلله على السلامة و دموعها أربع أربع , مو مصدقة إن عبود جدامها , و معاها باقة ورد جوري أحمر ..
عبدالله : الله يسلمج يالغالية , و سلموا على بعض بس ما ضموا بعض عيب اهم بالمطار مو نور و مهند يلمون بعض بأي مكان هع ..
نورة و عبدالله بالسيارة ,,

نورة : آآآه و أخيرا جا هاليوم و كحلت عيوني بشوفتك ..

عبدالله : ايي و الله و اخيرا , و يمسك ايدها بقوة ..
نورة : هي شوي شوي على ايدي لا تكسرها هههههههه.. و تشغل مرينا اف ام و الا حاطين أغنية ماجد المهندس روحي بلقاك تفز فزة حمامة و الحبيبين عايشين جو مع هالأغنية <<< لأن اللي يحب كل ما يشوف الحبيب يفز قليه فز ههههههههههههه ..
نورة : اشترت لعبود ساعة و قلم و ميدالية من ماركة فاخرة و غالية , و حطتهم بصندوق لونه أحمر <<< خو اللون الأحمر يرمز للحب ..
يوم وقفوا عند الإشارة ::
نورة : شوف هديتك بس لما تروح البيت بطلها مو ألحين Smile ..
عبدالله : يه يه ليش مكلفة على عمرج يالغالية وجودك قبالي هو أكبر و أغلى هدية ..
نورة : وجهها صار أحمر طماطة من كثر ما هي مستحية Embarassed , قالت : لا كلفت على عمري و لا شي , انت لو تبيني اهدي لك روحي جان اهديت لك روحي و عمري , جم عبود عندي Smile
عبدالله : يا بعد جبدي والله ..
نورة و مو بس هاذي المفاجأة ..
عبدالله : يالله و رينا شنو مخبية لنا ..
نورة : اوكي ولا يهمك هههههه ..
و راحوا لمطعم يطل ع البحر و الجو كان يهبل مثل أجواءنا هالأيام و أحلى بعد , و كان الجو حيل حيل رومانسي ..
و اركبوا سيارتهم بعد العشا الرومانسي و بطلوا الدرايش و السيارة تمشي ثمانين <<< عشان ما نخلي الناس تدق السرعة 100 , 200 , و عشان نتفادى الحوادث و خسارة قصة حب جميلة هع ..
ووصل الحبيبة لبيتها بعد قضاء أحلى الأوقات في حياتهم و بعد لقاء دام إنتظاره لمدة أشهر , و عبدالله الفرحة مو شايلته لأنه رد لديرته و رجع لحياته بين أهله و أحبابه و أصدقاءه و اهو مرفوع الراس ..


^^^
من زود الفراغة اللي فينا قلنا نكتب شي ممتع و يدغدغ مشاعرنا شوي ههههههههههههههه
و عقبال ما تعيشون قصة حب تعيّشكم في عالم الحب و الرومانسية .. و أتمنى تنال على إعجابكم هذه القصة ..

دمتم بخير أحبتي ~
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
نينا ريتشي



انثى عدد الرسائل : 825
المهنة/التخصص : كمبيوتر
تاريخ التسجيل : 23/08/2009

مُساهمةموضوع: رد: قصة قصيرة جداً و من وحي الخيال .. ( عبدالله , نورة )    الأربعاء نوفمبر 10, 2010 2:25 pm

اليوم بنكمل القصة ..
و بتكون الجزء الثاني , و لو إني قلت بخليها جزء واحد , لكن تحمست لأحداث القصة لأني و انا أكتبها عشت الأحداث و جنها جدامي
.. و أتمنى من كل قلبي إنها تعجبكم ..

أترككم مع القصة ::


نورة و عبدالله قرب يوم زواجهم و الكل يخب و يطيح لأن ما بقى شي ع العرس , و نورة كله حاطة ايدها على قلبها , اما عبدالله صج خايف من حياته الجديدة لكن بنفس الوقت رايق و قاعد يغني من كثر الفرحة اللي في داخله ..
طبعا ماراح اذكر الاهل كلهم لأن توني مبتدئة على كتابة القصص , ام نورة 40 سنة أبو نورة 49 , خلود 19 سالم 17 , ام عبدالله 50 ابو عبدالله 55 , نواف 22 علي 20 ..

ام عبدالله و نورة و خلود قاعدين بالصالة يشربون جاي الضحى و طبعا باجر موعد العرس و الكل مستعد ..
ام عبدالله : نورة حبيبتي راح نفقدج و راح يكون مكانج خالي يعل عيني ما تبكيج , و ادموعها اربع اربع
نورة : يما خلاص لا تخليني أبجي بروح اني مو طايقة روحي لأني بفارق هالبيت و أعيش ببيت عمري ما عشت فيه و خنقتها العبرة و بجت ..
خلود : و بعدين وياكم , شكلكم ناوين علي و تبوني أكمل البجية معاكم , فديتج يا نوروه و الله راح أفقدج , أنا من وعيت على الدنيا و انتي قبالي , مادري شلون بتحمل غيبتج عني , لكن انتي مو أول و لا آخر بنت تتزوج و تعيش ببيت غير عن بيت أهلها ..
ام نورة : يما حبيبتي نورة البنت مالها الا بيت زوجها , و ها انا اكبر مثال جدامج , تزوجت و جبتكم و ربيتكم و كبرتكم , و ماشاء الله بتصيرين عروس , و جعلني أشوف الباجي في يوم عرسهم ..
نورة : آمين يارب , و يخليج لنا يا تاج راسنا ..
خلود : آآآآآآآآآميين ..
ابو نورة : السلام عليكم
الكل : و عليكم السلام
ابو نورة : يالله نجبوا الغدا متنا من الجوع .. بغسل و ببدل و أنزل ..
ام نورة : ان شاء الله دقايق و يكون جاهز الغدا ..
سالم : السلامو عليكوووم ..
الكل و عليكم السلام ..
نورة : سلوم يالله بدل بسرعة و تعال ابي الغدا يكون جماعي اليوم ما أبي يكون في أحد غايب منكم ..
سالم : ان شاء الله يا أختي العزيزة يا أحلى عروس ..
نورة : يا ملقك يعني لازم تذكرني خلني ألقط نفسي مرة ماني قادرة ..
سالم : الله يعينج ههههههههههه ..
نورة : تضحك ها , يالله بنشوف شبتسوي في ليلة عرسك .. مادري منو طايحة الحظ اللي بتقبل فيك هههههههههههههه ..
سالم : بدت الشماتة هاا ..
نورة : أقول سلوم لا تكثر الحجي روح بدل يالله ..
الكل قاعدين على الغدا ..
و الكل ساكت و ياكل ..
ابو نورة : ها شلونج يا عروستنا ..
نورة : تمام الحمدلله و اهي مستحييية شوية و تدش تحت الطاولة ..
خلود : يبا عطني فلوس اللي عندي مو مكفيني حق الصالون
ابو نورة : و انتوا ما تخلصون من هالطلبات كله عطني عطني ..
خلود : يبااآآ أمانة بس هالمرة و أوعدك الشهر الجاي ماراح أخليك تعطيني مصروف ..
ابو نورة : المشكلة قلوبنا ما تخلينا نقول لا و نمنعكم ..
خلود : قامت و باسته على راسه , و قالت : الله يخليك لنا يا أغلى ابو بالدنيا Smile
ابو نورة : ها سلوم شلونك مع المدرسة اليوم ان شاء الله ما كو هوشات مني مناك ..
سالم : لا يبا بطلنا هوشات ملينا و احنا نتطاقق مع هالصبيان لو نطقهم مني لي باجر ماراح يعقلون و يفكوننا ..
ابو نورة : و الله زين تسوي لكن شنو عقبه .. Smile
ام نورة : مو جنك نسيتني و لا سألتني عن يومي ..
ابو نورة : افا والله ما عاش من ينساج انتي الكل بالكل و من دونج البيت بيصير مظلم يالغالية ..
ام نورة : يعل عيني ما تبجيك يا أغلى من عرفت في حياتي ..
الكل : يصفرووون و الله و طلعتوا رومانسيين و احنا ما ندري ..
الكل : ههههههههههههههههههههههههههههه
الكل قام من الغدا و غسل و نام عشان يجددون نشاطهم خو باجر وراهم عرس لازم ينامون ويرتاحون ..
بيت عبدالله :
المغرب الساعة 6 ..
عبدالله : و اهو بغرفته غرفة العزوبية , قال : آآآآه يا غرفتي يا سريري اليوم آخر يوم أكون عندكم من وعيت على هالدنيا
و انتي مكان راحتي , لكن أعذريني لقينا اللي يريحنا أكثر و ينسينا الدنيا و اللي فيها ههههههههه ..
ام عبدالله : عبدالله عبود يمااا تعال ..
عبدالله : هلا يما بغيتي شي ..؟؟
ام عبدالله : ايي يما بغيتك توديني الجمعية بشتري لي أغراض ناقصتني ..
عبدالله : من عيوني , دقايق و أكون جاهز ..
ابوعبدالله : ام عبدالله ام عبدالله ..
نواف : هلا يبا بغيت شي ..
ابو عبدالله : ايي بس وين امك ..؟؟
نواف : راحت مع عبدالله الجمعية و بترد ..
ابو عبدالله : وليييه انا ابيها ضروري و ألحين ..
نواف : اهم من زمان رايحين أكيد راح يوصلون ألحين ..
ابو عبدالله : بننطر أمرنا لله ..
علي توه راد من النادي لازم كل عصر يروح للنادي و يتمرن و ما يرد إلا المغرب ..
علي : السلام عليكم ..
الكل : و عليكم السلام
علي : شلونك يبا و يبوس راسه ..
ابو عبدالله : بخير يا ولدي ..
علي : عساه دووم ..
ابو عبدالله : يه تأخرت أمكم ..
علي : خلاص بدق عليها انا ..
ام عبدالله : الو هلا يما بغيت شي ..
علي : لا سلامتج , بس الوالد ينطرج بالبيت يبيج ضروري ..
ام عبدالله : يالله انا بالطريج شوي و أكون عندكم ..
علي : اوكي ننطرج مع السلامة ..
ابوعبدالله : ها بشر متى بتوصل ..؟
علي : قالت شوي و توصل ..
و صلت أم عبدالله و ولدها عبدالله ..
ام عبدالله : السلام عليكم ..
الكل : و عليكم السلام ..
ابو عبدالله : وينج حيل تأخرتي ..
ام عبدالله : شسوي كان عندي حاجات و ما قدرت أشتريها إلا اليوم ..
و راحوا فوق بغرفتهم ..
ابو عبدالله : بغيتج بشغلة وين بشتي يوم عرسنا ..
ام عبدالله : هههههههههههه الله يقطع بليسك , من اليوم تنطرني عشان تسألني عن بشت مضى عليه الزمن و كلا ..
ابو عبدالله : عن الطنازة , يالله وينه ..؟
ام عبدالله : من صجك بتلبس ولدك بشت قديم , صج ما عندك سالفة ..
ابو عبدالله : ولييه هاذي اللي بترفع ضغطي ..
ام عبدالله : خلاص ما يصير خاطرك إلا طيب .. شوي بروح المخزن و أطلعه ..
ابو عبدالله : يالله ناطرج ..
و نزلت تحت و طلعت بشت زوجها في يوم عرسهم .. و لما شافته اسرحت و رجع فيها الزمن لي ورا
و تذكرت يوم أول ما شافت ابو عبدالله و اهو لابس هالبشت بعز شبابه , و حبته من أول نظرة Smile
ابو عبدالله اول ما شاف البشت البسه يبي يجربه عقب كل هالعمر و حس بشعور ما ينوصف , لبسة البشت لها طعم
و خاصة إذا لبسها المعرس بليلة عرسه , و هاذي عادة حلوة متمسكين فيها لي ألحين ..
لكن قال ابو عبدالله في نفسه لا لا شهالتصرف اللي خلاني اسوي بولدي جذيه , بما إنه معرس جديد لازم يلبس بشت جديد ..
و تراجع لكن ما رد البشت للمخزن , حطاه بكرتون في خزانته .. لأن هالبشت له ذكريات حلوة و لي الحين متمسك فيها ابوعبدالله ..
ام عبدالله : ابو عبدالله يالله شوي و ننجب العشا تعال قبل لا يبرد العشا ..
ابو عبدالله : يالله شوي و انزل و مسح دموعه لأنه حن لأيام شبابه ..
و الكل قعد على العشا .. و الصمت يأسر المكان ..
ابو عبدالله : شفيكم كل واحد ساكت تكلموا قولوا شي ..
ام عبدالله : شنسوي خنت عيني عبود بيصير معرس و بيودع حياة العزوبية .. و بيكون عندنا شخص جديد في بيتنا ..
نواف : ايي والله اللي يتزوج حتى لو ما يتغير من الداخل لكن تكثر مسؤولياته و التزاماته و يكون دايما مشغول عكس حياة العزوبية ..
علي : و في أحلى من العزوبية , عايش حياتي ومبسوط لاهم و لا عوار راس ..
نواف : بنشوف باجر ان ما قلت يما اخطبي لي ما اكون نواف ..
علي : لا ما ني قايل , بصير عزوبي طووول عمري هههههههههههه
الكل : هههههههههههههههههههه
ام عبدالله : يما علوي ما يصير مثل ما أبي أشوف عيال اخوانك هم أبي أشوف عيالك ..
علي : إن شاء الله يما بس مو عن قريب ههههههههه الله يطول لنا في عمرج و يخليج لنا يا أمنا العزيزة ..
الكل : آآآمين ..

بيت أم نورة ..
الساعة 9 بالليل ..
نورة و خلود تجهزوا و خلصوا كل شي ما باقي إلا يروحون للصالون من الصبح , و قاعدين يطالعون التلفزيون بس نورة بالها
مو عند التلفزيون عند حبيب القلب عبدالله .. و خلود مندمجة مع أحداث الفيلم , مثل ما يقولون كلن على همه سرى ..
ام نورة : نورة حبيبتي يالله قومي نامي تدرين باجر عرسج لازم تريحين قبل الزحمة و اللوية .. خلود يالله انتي قومي بعد ..
خلود : لا يمااا باجي ربع ساعة و يخلص الفيلم ..
ام نورة : اوكي يالله اول ما ينتهي الفيلم على طول نامي ترى بقعدكم من صبح ..
خلود : اوكي مامي .. Smile
نورة : تصبحين على خير يما <<< و اهي مهمومة لأن هاذي آخرليلة لها في البيت اللي تربت و اكبرت فيه ..
ام نورة و انتي من أهله ..
نورة أول ما حطت راسها ع المخدة اخنقتها العبرة ما قدرت تمسك نفسها Sad و كان كل شي بداخلها مو مفهوم لأنها مقبلة على
حياة جديدة و لا تعرف شنو اللي فيها , و هالشي طبيعي و بيروح مع الوقت .. و ترد المياه لمجاريها و تمشي الحياة بدون توقف ..

بيت عبدالله :::
عبدالله هم يبي ينام مبجر بس مو قادر , يتقلب يمين يسار و لا اكو فايدة ما ينلام باجر عرسه , و قال أروح للحديقة شوي و أشم هوا احس اني مخنوق , و نزل ولد الحلال و قعد بالحديقة , و فكره يوديه يمين و يسار فوق تحت هع سرحان الأخ .. و بعد ما حس بالتعب قال اروح انام جم ساعة قبل اللوية الكبرى .. و راح لغرفته و نام على طول عقب تفكير دام لساعات لأن هاذي آخر ليلة للعزوبية ..
و الكل نام و صار البيت هادي ما ينسمع و لا صوت , بس صوت قطاوة الفريج و اهي تتهاوش مع بعض و تصارخ .. هههههههههههههههههههههههههههههههه

أنا كتبت الجزء الثاني من القصة ..
لكن إذا ما كو ردود مشجعة ماراح أكمل القصة , و قولوا نينا ما قالت ..
بليييز نبي شي يشجعنا عشان نبدع في القصة أكثر من جذي .. بلييييز .. ما أبي أحد يمر مرور الكرام ..
ناطرة الردود Neutral ..
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
نينا ريتشي



انثى عدد الرسائل : 825
المهنة/التخصص : كمبيوتر
تاريخ التسجيل : 23/08/2009

مُساهمةموضوع: رد: قصة قصيرة جداً و من وحي الخيال .. ( عبدالله , نورة )    الخميس نوفمبر 11, 2010 9:07 am

Sad مالت عليكم انزيييين , خلاص ماراح أكملها Sad
شكرا لتجاهلكم .. هههههههههههههههههه Very Happy
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
قصة قصيرة جداً و من وحي الخيال .. ( عبدالله , نورة )
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
المعهد العالي للاتصالات والملاحة :: المنتديات العامه :: استراحة المنتدى-
انتقل الى: